پشاور (نمائندہ خصوصی) — تعلیم و تحقیق کے شعبے میں باہمی تعاون کے فروغ کے لیے سینٹر فار ایجوکیشنل ریسرچ اینڈ پالیسی اینالیسس (سراپا) اور انسٹی ٹیوٹ آف ریجنل اسٹڈیز (آئی آر ایس) پشاور کے مابین گزشتہ روز مفاہمت کی ایک یادداشت (MoU) پر دستخط کیے گئے۔
آئی آر ایس کے دفتر پشاور میں منعقد ہونے والی تقریب میں ڈائریکٹر آئی آر ایس ڈاکٹر محمد اقبال خلیل اور ڈائریکٹر سراپا صاحبزادہ وسیم حیدر نے معاہدے پر دستخط کیے۔ اس موقع پر دونوں اداروں کے اعلیٰ حکام اور مہمانِ خصوصی بھی موجود تھے۔
اس معاہدے کے تحت دونوں اداروں نے تعلیمی تحقیق، پالیسی سازی اور تعلیمی اشتراک کے مختلف شعبوں میں باہمی تعاون پر اتفاق کیا۔ شراکت داری کا مقصد شواہد پر مبنی تعلیمی پالیسیوں کا فروغ، مشترکہ تحقیقی منصوبوں کی تکمیل، سیمینارز، ورکشاپس، تربیتی پروگرامز کے انعقاد اور علم و تجربے کے تبادلے کو فروغ دینا ہے۔
ڈائریکٹر سراپا صاحبزادہ وسیم حیدر نے کہا کہ یہ معاہدہ پاکستان میں تعلیمی معیار کو بہتر بنانے اور طلبہ و تعلیمی اداروں کو درپیش مسائل کے حل کے لیے دونوں اداروں کے مشترکہ عزم کی عکاسی کرتا ہے۔انہوں نے مزید کہا کہ طلبہ کو پیشہ وارانہ ترقی کے مواقع فراہم کرنے کے لیے انٹرن شپ پروگرامز بھی شروع کیے جائیں گے۔ ان کا کہنا تھا کہ “آج کے معاہدے کا مقصد تعلیم و تحقیق کے شعبے میں اشتراک کے ذریعے ترقی و فروغ کو ممکن بنانا ہے۔ ہم تحقیق کے کلچر کو فروغ دے کر اپنا مستقبل آج سے بہتر بنا سکتے ہیں۔”
تقریب میں انچارج سراپا نور محمد، صدر بزمِ شاہین خیبرپختونخوا رشید اللہ، نگران سرکاری کالجز خیبرپختونخوا عبیدالرحمٰن، اور ناظم پشاور حسن امین سمیت دیگر ذمہ داران بھی شریک تھے۔
