جے یو آئی آئینی عدالت کے حق میں تھی،حکومت عدلیہ کو مکمل طور پر اپنے پنجے کے نیچے رکھنا چاہتی ہے،پریس کانفرنس
اسلام آباد(ویب ڈیسک) سربراہ جے یو آئی ف مولانا فضل الرحمان کا کہنا ہے 27 ویں آئینی ترمیم کو مکمل طور پر مسترد کرتے ہیں۔اسلام آباد میں پریس کانفرنس کرتے ہوئے مولانا فضل الرحمان کا کہنا تھا سب سے پہلے ہمیں بنیادی مسئلے کو دیکھنا ہے، ایک سال قبل 26 ویں آئینی ترمیم پارلیمنٹ میں لائی گئی، عدلیہ سے متعلق 26ویں ترمیم اب بھی عدالت میں ہے اور نئی ترمیم لائی گئی، جے یو آئی آئینی عدالت کے حق میں تھی۔انہوں نے کہا کہ 27 ویں آئینی ترمیم سے نہ دستور میں بہتری آئے گی نہ عوامی مفاد کا تقاضا پورا کرے گی، 27 ویں آئینی ترمیم کو مکمل طور پر مسترد کرتے ہیں، حکومت عدلیہ کو مکمل طور پر اپنے پنجے کے نیچے رکھنا چاہتی ہے۔ان کا کہنا تھا ہم نے آئین کے تحفظ کا حلف اٹھایا ہے، اپوزیشن اور ہر مکتب فکر کو اعتماد میں لے کر آئین بنایا گیا تھا، پیپلز پارٹی نے بھی جمہوریت کی نفی میں اپنا کردار ادا کیا، پیپلزپارٹی نے اپنی روایات کو برقرار نہیں رکھا۔سربراہ جے یو آئی کا کہنا تھا 27 ویں ترمیم میں ایسی پیچیدگیاں ہیں عدالت بھی انہیں سمجھ نہیں پا رہی، ترمیم پاس کرنے کے لیے ضروری ہے کہ آپ سب کو ترجیح دیں اور اعتماد میں لیں۔
