نوٹس کا مقصد شہری پالیسی میں تعلیم کو بطور بنیادی جزو شامل کرنا ہے، توجہ دلاؤ نوٹس رکن اسمبلی ایمن جلیل نے پیش کیا
پشاور(پ ر)جمعیت علماء اسلام ف سے تعلق رکھنے والی خیبرپختونخوا اسمبلی کی خاتون رکن ایمن جلیل نے صوبائی اسمبلی میں توجہ دلاؤ نوٹس جمع کرا دیا۔ رکن اسمبلی ایمن جلیل نے خیبر پختونخوا اربن پالیسی 2022–2030 میں ترمیم کے لیے توجہ دلاؤ نوٹس پیش کیا۔ اس نوٹس کا مقصد شہری پالیسی میں تعلیم کو بطور بنیادی جزو شامل کرنا ہے، جس میں خاص طور پر لڑکیوں کی تعلیم اور سکول سے باہر بچوں پر توجہ مرکوز کی گئی ہے۔یہ اقدام شہری ترقی کو انسانی ترقی کے نتائج سے جوڑنے اور اس اہم پالیسی خلا کو پُر کرنے کی کوشش ہے تاکہ تعلیم کو پائیدار اور جامع شہروں کے ایک لازمی جزو کے طور پر تسلیم کیا جا سکے۔
توجہ دلاؤ نوٹس میں بتایا گیا ہے کہ خیبر پختونخوا اربن پالیسی 2022–2030 صوبے میں شہری آبادی کے تیز رفتار پھیلاؤ کے انتظام کے لیے ایک جامع فریم ورک فراہم کرتی ہے، جس میں زمین کے استعمال، رہائش، ٹرانسپورٹ، بلدیاتی سہولیات، ماحولیاتی لچک، صنفی حساسیت اور سماجی نقل و حرکت جیسے اہم پہلو شامل ہیں۔ تاہم، ان تمام وعدوں کے باوجود پالیسی میں تعلیم، خصوصاً شہری غریب اور محروم آبادیوں میں رہنے والی لڑکیوں اور سکول سے باہر بچوں کے مسائل پر واضح توجہ نہیں دی گئی۔توجہ دلاؤ نوٹس پیش کرنے کے پس منظر پر روشنی ڈالتے ہوئے ایمن جلیل نے کہا کہ ہمارے شہر اس وقت تک حقیقی ترقی نہیں کر سکتے جب تک لڑکیوں کو تعلیم سے محروم رکھا جائے اور ہزاروں بچے سکول سے باہر رہیں۔ شہری پالیسیوں کو ہماری کمیونٹیز کی زمینی حقیقتوں کی عکاسی کرنی چاہیے تاکہ شہری ترقی لڑکیوں اور محروم بچوں کے لیے حقیقی مواقع میں ڈھل سکے۔
ایمن جلیل نے توجہ دلاؤ نوٹس کے ذریعے اس بات پر زور دیا کہ اربن پالیسی کو پاکستان کے آئینی تقاضے آرٹیکل 25-اے (تعلیم کا حق) اور پائیدار ترقی کے ہدف نمبر 4 (معیاری تعلیم) سے ہم آہنگ کیا جائے۔ نوٹس میں نشاندہی کی گئی کہ اگر تعلیم کو شہری منصوبہ بندی میں شامل نہ کیا گیا تو شہری ترقی عدم مساوات میں اضافہ کرے گی، سماجی نقل و حرکت کو محدود کرے گی اور لڑکیوں و کمزور بچوں کو تعلیمی مواقع سے محروم رکھے گی۔اس اقدام کا خیرمقدم کرتے ہوئے قمر نسیم، ایجوکیشن چیمپئن اور بلو وینز کے پروگرام منیجر نے اسے بروقت اور تبدیلی لانے والا اقدام قرار دیا۔ انہوں نے کہا کہ یہ توجہ دلاؤ نوٹس ایک جرات مندانہ اور نہایت ضروری اقدام ہے۔ تعلیم، بالخصوص لڑکیوں کی تعلیم کے بغیر شہری ترقی صرف عدم مساوات کو ہی جنم دیتی ہے۔
اربن پالیسی میں ترمیم کے ذریعے ایمن جلیل نے تعلیم کو شہری انصاف اور سماجی ترقی کے مرکز میں لا کھڑا کیا ہے۔سول سوسائٹی تنظیموں، طالبات اور شہریوں نے صوبائی حکومت سے مطالبہ کیا کہ وہ اس توجہ دلاؤ نوٹس کا مثبت جواب دے، اربن پالیسی میں مناسب ترامیم یا اضافے متعارف کرائے اور اس بات کو یقینی بنایا جائے کہ خصوصاً لڑکیوں کی تعلیم اور سکول سے باہر بچوں کے مسائل کو خیبر پختونخوا میں مستقبل کی شہری منصوبہ بندی اور عملدرآمد کے تمام مراحل میں بامعنی طور پر شامل کیا جائے۔
