اسلام آباد میں میڈیا سے گفتگو کرتے ہوئے وزیراعلیٰ خیبرپختونخوا کے معاون خصوصی برائے اطلاعات شفیع جان نے کہا ہے کہ وزیراعلیٰ سہیل آفریدی کو بانی چیئرمین عمران خان سے اڈیالہ جیل میں ملاقات سے روکنا قابلِ مذمت اقدام ہے۔ انہوں نے کہا کہ وزیراعلیٰ کا اپنے قائد سے ملاقات کرنا ان کا آئینی اور قانونی حق ہے، اس کے باوجود آج ایک بار پھر انہیں ملاقات کی اجازت نہیں دی گئی۔
شفیع جان نے بتایا کہ عمران خان سے ملاقات کے حوالے سے اسلام آباد ہائیکورٹ کے واضح احکامات بھی موجود ہیں، لیکن اس کے باوجود مسلسل رکاوٹیں کھڑی کی جا رہی ہیں۔ ان کے مطابق وزیراعلیٰ صوبے کے عوام کے منتخب نمائندہ ہیں، اس لیے انہیں اس حق سے محروم کرنا سمجھ سے بالاتر ہے۔
معاون خصوصی نے عمران خان کی قید تنہائی پر گہری تشویش کا اظہار کرتے ہوئے کہا کہ بانی چیئرمین کو کسی صورت قید تنہائی میں نہیں رہنے دیا جائے گا۔ انہوں نے مسلم لیگ ن پر تنقید کرتے ہوئے کہا کہ جب نواز شریف وزیراعظم تھے تو پوری کابینہ ان سے ملاقات کیلئے لندن جاتی تھی، لیکن آج ایک منتخب وزیراعلیٰ کو اپنے قائد سے ملنے تک نہیں دیا جا رہا۔
احتجاج سے متعلق سوال پر شفیع جان نے کہا کہ پارٹی عمران خان کی ہدایت کی منتظر ہے، اور جیسے ہی ان کی جانب سے پیغام موصول ہوا، خیبرپختونخوا سے لاکھوں کارکن احتجاج میں شریک ہوں گے۔ انہوں نے مزید کہا کہ وزیراعلیٰ سہیل آفریدی کی قیادت میں پوری پارٹی متحد اور متحرک ہے۔
