وزیر اعلیٰ خیبرپختونخوا کے معاون خصوصی برائے اطلاعات و تعلقات عامہ شفیع جان نے کہا ہے کہ صوبائی اسمبلی میں ہونے والا خیبرپختونخوا امن جرگہ صوبائی حکومت کی ایک بہت بڑی کامیابی ہے۔ ان کے مطابق وزیر اعلیٰ محمد سہیل آفریدی اور سپیکر صوبائی اسمبلی بابر سلیم سواتی اس کامیاب جرگے کے انعقاد پر خراج تحسین کے مستحق ہیں، اور امید ہے کہ جرگے میں پیش کردہ تجاویز قیامِ امن کے لیے سنگ میل ثابت ہوں گی۔
میڈیا نمائندوں سے گفتگو کرتے ہوئے شفیع جان نے بتایا کہ اس تاریخی امن جرگے میں وزیر اعلیٰ خیبرپختونخوا محمد سہیل آفریدی، گورنر خیبرپختونخوا فیصل کریم کنڈی، سپیکر صوبائی اسمبلی بابر سلیم سواتی، اپوزیشن لیڈر ڈاکٹر عباد، سابق گورنرز، سابق وزرائے اعلیٰ، قبائلی مشران، مختلف سیاسی جماعتوں کے رہنما، صوبائی و قومی میڈیا اور سول سوسائٹی کے نمائندوں نے بھرپور شرکت کی۔ جرگے میں قیام امن کے حوالے سے قیمتی تجاویز پیش کی گئیں۔
شفیع جان نے کہا کہ آج کا دن خیبرپختونخوا کی تاریخ کا یادگار دن ہے اور اسے سنہری حروف سے لکھا جائے گا۔ انہوں نے بتایا کہ امن جرگے میں باہمی اتفاق رائے سے 15 نکات پر مشتمل سفارشات منظور کی گئی ہیں، جن کی روشنی میں خیبرپختونخوا حکومت آئندہ کے فیصلے کرے گی۔
انہوں نے مزید بتایا کہ مختلف سیاسی جماعتوں کے نمائندوں پر مشتمل ڈرافٹ کمیٹی تشکیل دی گئی ہے تاکہ مشترکہ حکمتِ عملی کے ذریعے صوبے میں امن کے قیام کو یقینی بنایا جا سکے۔ ان کا کہنا تھا کہ خیبرپختونخوا اس وقت امن و امان کے سنگین چیلنجز سے دوچار ہے، خیبر، کاٹلنگ، باجوڑ اور دیگر علاقوں کے حالیہ واقعات اس کی واضح مثال ہیں۔ انہی حالات کے پیش نظر صوبائی حکومت نے صوبے کی تاریخ کا یہ گرینڈ امن جرگہ بلایا تاکہ تمام مکاتب فکر کو ایک پلیٹ فارم پر جمع کیا جا سکے۔
معاون خصوصی برائے اطلاعات نے امید ظاہر کی کہ خیبرپختونخوا امن جرگہ کی شکل میں حکومت کی یہ کاوش پائیدار امن کے قیام میں سنگ میل ثابت ہوگی۔ انہوں نے کہا کہ امن کا مسئلہ ہم سب کا مشترکہ مسئلہ ہے اور پاکستان تحریک انصاف کو عوام نے جو مینڈیٹ دیا ہے، وہ اس پر پورا اترے گی۔ انہوں نے یقین دلایا کہ عمران خان کے وژن کے مطابق صوبے میں پائیدار امن کو ہر صورت یقینی بنایا جائے گا۔
