خیبر سے: امان علی شینواری
آل پاکستان حسام الدین و لیاقت مرحوم فٹ بال ٹورنامنٹ کا شاندار اختتام، پاک شینواری فٹبال کلب نے 2025 کی ٹرافی اپنے نام کر لی
خیبر کی سرزمین پر کھیلوں کے سب سے بڑے فٹبال ایونٹ آل پاکستان حسام الدین و لیاقت مرحوم فٹ بال ٹورنامنٹ کا شاندار اور یادگار اختتام ہوا۔ فائنل میچ میں شینواری ستوری فٹ بال کلب اور پاک شینواری فٹ بال کلب کے درمیان سنسنی خیز مقابلہ دیکھنے کو ملا۔
میچ مقررہ وقت تک برابر رہنے کے بعد فیصلہ کن مرحلہ پینلٹی ککس تک جا پہنچا، جہاں پاک شینواری فٹبال کلب نے اعصاب شکن مقابلے کے بعد فائنل ٹرافی اپنے نام کر لی۔
فائنل میچ کے مہمانانِ خصوصی میں کمانڈنٹ خیبر رائفلز کرنل سعید، ڈسٹرکٹ سپورٹس آفیسر محمد حسین، تحصیل چیئرمین شاہ خالد شینواری اور ٹورنامنٹ کے اسپانسر ضیاء الحق آفریدی شامل تھے۔
گراؤنڈ شائقینِ کھیل سے کھچا کھچ بھرا ہوا تھا جہاں ہزاروں تماشائیوں نے دونوں ٹیموں کی بہترین کارکردگی پر بھرپور داد دی اور نوجوان کھلاڑیوں کی حوصلہ افزائی کی۔
یہ آل پاکستان فٹ بال ٹورنامنٹ خیبر سپورٹس کلب کے زیراہتمام منعقد ہوا، جس میں مجموعی طور پر 64 ٹیموں نے حصہ لیا — جن میں 32 لوکل اور 32 نان لوکل ٹیمیں شامل تھیں۔
خیبر سپورٹس کلب کے صدر معراج الدین شینواری، چیئرمین وکیل خان اور جنرل سیکرٹری کلیم اللہ شینواری نے اس موقع پر کہا کہ اس ٹورنامنٹ کا مقصد نوجوانوں کو منفی سرگرمیوں سے دور رکھ کر مثبت اور صحت مند سرگرمیوں کی طرف راغب کرنا ہے۔
ان کا کہنا تھا کہ لنڈی کوتل میٹی کھیلوں کے حوالے سے انتہائی زرخیز علاقہ ہے جس نے فٹبال اور کرکٹ میں ملک کو بین الاقوامی کھلاڑی فراہم کیے ہیں، تاہم افسوس کی بات ہے کہ آج تک یہاں کوئی اسپورٹس کمپلیکس تعمیر نہیں کیا گیا۔
انہوں نے مزید کہا کہ سہولیات کے فقدان کے باوجود خیبر سپورٹس کلب کھیل کے میدان کو آباد رکھے ہوئے ہے اور نوجوانوں کو اپنے وسائل سے مواقع فراہم کر رہا ہے۔ معراج الدین شینواری نے بتایا کہ 1982 سے خیبر سپورٹس کلب سالانہ اسپورٹس میلہ منعقد کر رہا ہے اور لنڈی کوتل کو ملک بھر میں سب سے زیادہ شائقینِ کھیل کا اعزاز حاصل ہے، لیکن افسوس کہ آج بھی گراؤنڈ میں تماشائیوں کے لیے بیٹھنے کی جگہ اور کھلاڑیوں کے لیے چینجنگ روم موجود نہیں۔
آخر میں، خیبر سپورٹس کلب کے صدر معراج الدین شینواری نے تمام مہمانوں، کھلاڑیوں اور شائقینِ کھیل کا شکریہ ادا کیا۔اختتامی تقریب کے دوران مہمانانِ خصوصی نے ونر ٹیم پاک شینواری فٹبال کلب کو ایک لاکھ روپے نقد انعام، جبکہ رنر اپ ٹیم شنواری ستوری فٹبال کلب کو پچاس ہزار روپے کا انعام دیا۔ اس کے علاوہ بہترین کارکردگی دکھانے والے کھلاڑیوں میں بھی خصوصی انعامات تقسیم کیے گئے۔
فائنل میچ کے موقع پر کمانڈنٹ خیبر رائفلز کرنل سعید، ڈسٹرکٹ سپورٹس آفیسر محمد حسین، تحصیل چیئرمین شاہ خالد شینواری، تعمیر گروپ کے ضیاء الحق آفریدی، مراد حسین آفریدی، کسٹم کلئیرنگ ایجنٹس ایسوسی ایشن کے صدر مجیب شینواری سمیت قومی مشران اور ہزاروں شائقینِ کھیل نے شرکت کی۔لنڈی کوتل کا یہ فٹبال میلہ نوجوانوں کے جذبے، امن، اور کھیل سے محبت کی ایک شاندار مثال قرار دیا جا رہا ہے۔
