باڑہ: ڈسٹرکٹ خیبر لیبر ونگ کے صدر لعل ولی آفریدی نے نجی فیکٹریوں کے مالکان سے مطالبہ کیا ہے کہ عیدالفطر سے پہلے فیکٹریوں میں کام کرنے والے مزدوروں کو ان کی مکمل تنخواہیں ادا کی جائیں تاکہ وہ بھی اپنے بچوں کے ساتھ عید کی خوشیوں میں شریک ہو سکیں۔ انہوں نے کہا کہ عیدالفطر تک تنخواہوں کی مدت مکمل ہونے کے باوجود اگر مزدوروں کو ادائیگی نہ کی جائے تو ان کے بچے عید کی خوشیوں سے محروم رہ جاتے ہیں، اس لیے مالکان کو چاہیے کہ مزدوروں کے ساتھ تعاون کرتے ہوئے بروقت تنخواہیں ادا کریں۔
لعل ولی آفریدی نے کہا کہ مزدور طبقہ پہلے ہی کم تنخواہوں کے باعث شدید معاشی مشکلات کا شکار ہے۔ باڑہ، جمرود اور لنڈی کوتل کے بازاروں میں مٹھائی اور بیکری کی اشیاء کے سرکاری نرخ نامے آویزاں نہیں ہیں جبکہ غیر معیاری اشیاء خوردونوش بھی فروخت ہو رہی ہیں، جس کی وجہ سے عام شہری خصوصاً مزدور طبقہ اپنے بچوں کے لیے خریداری کرنے سے قاصر ہے۔
انہوں نے مزید کہا کہ حکومت کی جانب سے مقرر کردہ کم از کم اجرت تمام فیکٹریوں میں کام کرنے والے مزدوروں کو دی جائے۔ عیدالفطر کے قریب آتے ہی مٹھائی اور بیکری کی دکانوں پر سرکاری نرخ نامے آویزاں کیے جائیں تاکہ مختلف دکانوں پر مختلف قیمتوں کے رجحان کا خاتمہ ہو سکے۔
انہوں نے ضلعی انتظامیہ، محکمہ فوڈ، محکمہ پرائس کنٹرول اور محکمہ لیبر سے مطالبہ کیا کہ عیدالفطر سے پہلے اس صورتحال کا فوری نوٹس لیا جائے اور بازاروں میں قیمتوں اور معیار کی سخت نگرانی کی جائے، تاکہ عوام کو ریلیف مل سکے اور مزدور طبقہ بھی عید کی خوشیوں سے محروم نہ رہے۔
