پشاور: وزیراعلیٰ خیبرپختونخوا کے معاون خصوصی برائے اطلاعات و تعلقاتِ عامہ شفیع اللہ جان نے پشاور پریس کلب کے میگا سپورٹس ایونٹ کے لیے اعلان کردہ دو ملین (20 لاکھ) روپے کی گرانٹ کا چیک پشاور پریس کلب کے صدر ایم ریاض اور جنرل سیکرٹری عالمگیر خان کے حوالے کر دیا۔
یہ چیک وزیراعلیٰ خیبرپختونخوا محمد سہیل آفریدی کی جانب سے پشاور پریس کلب کی جانب سے منعقدہ میڈیا کرکٹ لیگ کی افتتاحی تقریب کے موقع پر اعلان کردہ گرانٹ کے تحت دیا گیا۔ معاون خصوصی شفیع اللہ جان نے جمعرات کے روز اپنے دفتر میں پشاور پریس کلب کی قیادت کو چیک پیش کیا۔
اس موقع پر پشاور پریس کلب کے صدر ایم ریاض نے وزیراعلیٰ خیبرپختونخوا محمد سہیل آفریدی اور معاون خصوصی برائے اطلاعات شفیع اللہ جان کا شکریہ ادا کرتے ہوئے کہا کہ یہ گرانٹ صحافیوں کے درمیان صحت مند سرگرمیوں اور کھیلوں کے فروغ میں اہم کردار ادا کرے گی۔ جنرل سیکرٹری عالمگیر خان نے بھی حکومتِ خیبرپختونخوا کے تعاون کو سراہا اور اسے صحافتی برادری کے لیے خوش آئند قرار دیا۔
