نامعلوم موٹر سائیکل سواروں کی عامر کی دکان پر دھاوا، فون چھیننے کی کوشش، علاقہ سوگوار
نوشہرہ (فیاض شاداب) تحصیل پبی کے نواحی علاقے اکبرپورہ میں امن و امان کی صورتحال ابتر، ڈکیتی و سنیچنگ کی خونریز واردات میں ایک نوجوان تاجر اپنی جان سے ہاتھ دھو بیٹھا۔
تفصیلات کے مطابق، اکبرپورہ بازار میں موبائل فون کی دکان کے مالک عامر خان گزشتہ رات حسبِ معمول اپنی دکان بند کر رہے تھے کہ اچانک نامعلوم مسلح ملزمان نے انہیں گھیر لیا۔ ملزمان نے اسلحہ کے زور پر ان سے قیمتی موبائل فون اور نقدی چھیننے کی کوشش کی۔
عینی شاہدین اور ابتدائی اطلاعات کے مطابق، عامر خان نے ہمت دکھاتے ہوئے مزاحمت کی، جس پر بپھرے ہوئے ملزمان نے اندھا دھند فائرنگ کر دی۔ گولیاں لگنے سے عامر خان شدید زخمی ہو کر زمین پر گر گئے جبکہ ملزمان موقع واردات سے فرار ہونے میں کامیاب ہو گئے۔
مقامی افراد نے فوری طور پر زخمی تاجر کو اٹھا کر پبی ہسپتال منتقل کرنے کی کوشش کی، تاہم زخموں کی تاب نہ لاتے ہوئے وہ راستے میں ہی دم توڑ گئے۔ عامر خان کی شہادت کی خبر جنگل کی آگ کی طرح پورے علاقے میں پھیل گئی، واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور شواہد اکٹھے کر کے تحقیقات کا آغاز کر دیا ہے۔ مقامی شہریوں اور تاجر برادری نے اعلیٰ حکام سے مطالبہ کیا ہے کہ قاتلوں کو فوری طور پر گرفتار کر کے نشانِ عبرت بنایا جائے اور بڑھتی ہوئی بدامنی پر قابو پایا جائے۔
