تبیلیسی (محمد مبین سے) جارجیا کے دارالحکومت تبیلیسی میں حکومت مخالف مظاہروں کا سلسلہ کئی دنوں سے جاری ہے۔ مظاہرین حکومتی جماعت پر روس نواز ہونے اور ملک کی یورپی یونین کی جانب پیش رفت کو روکنے کے الزامات لگا رہے ہیں۔
ہزاروں افراد سڑکوں پر نکلے اور بینرز اٹھا کر حکومت سے شفاف پالیسیوں اور یورپی یونین کی رکنیت کے لیے ٹھوس اقدامات کا مطالبہ کیا۔ مظاہرین نے کہا کہ موجودہ حکومت عوام کی امنگوں کے برعکس ملکی خارجہ پالیسی کو متاثر کر رہی ہے۔
حکومت نے مظاہرین کے احتجاج کے حق کا احترام کرتے ہوئے پرامن رہنے کی اپیل کی ہے، تاہم بعض مقامات پر مظاہرین اور پولیس کے درمیان کشیدگی بھی دیکھی گئی۔ پولیس نے ہجوم کو منتشر کرنے کے لیے لاٹھی چارج اور آنسو گیس استعمال کی۔
سیاسی ماہرین کا کہنا ہے کہ جارجیا کی موجودہ سیاسی صورتحال نہ صرف حکومت پر دباؤ ڈال رہی ہے بلکہ ملک کے یورپی راستے کو بھی پیچیدہ بنا رہی ہے۔ مظاہرین کا مطالبہ ہے کہ حکومت عوام کی رائے کو مدنظر رکھتے ہوئے شفاف اور مضبوط اقدامات کرے۔
تبیلیسی کے مرکزی سڑکوں اور عوامی مقامات پر مظاہروں کا سلسلہ جاری ہے اور حکومت کی جانب سے حالات پر مسلسل نظر رکھی جا رہی ہے۔
