امجد ہادی یوسفزئی
معروف اور باصلاحیت پشتو گلوکار عمران سواتی نے امن، بھائی چارے اور علاقائی ہم آہنگی کے فروغ کے لیے ایک اہم سنگل کی ریکارڈنگ مکمل کر لی ہے، جس میں پاکستان اور افغانستان کے درمیان دوستی اور محبت کا مضبوط پیغام دیا گیا ہے۔
اس منفرد اور بامقصد موسیقی منصوبے میں عمران سواتی پاکستان کی نمائندگی کر رہے ہیں، جبکہ معروف افغان گلوکار ہمت گل افغانستان کی جانب سے اپنی خوبصورت آواز شامل کر رہے ہیں، جو سرحد پار اتحاد اور مشترکہ ثقافتی ورثے کی علامت ہے۔
گیت کی ہدایت کاری احمد نواز نے کی ہے جبکہ ایڈیٹنگ صاحبزادہ نے انجام دی ہے۔ ذرائع کے مطابق یہ پشتو زبان میں تیار کیا گیا ہے، جس کے بول امن، محبت اور بھائی چارے پر مبنی ہیں اور پاک–افغان سرحد کے دونوں جانب بسنے والے عوام کے مشترکہ دکھ سکھ، گہرے ثقافتی رشتوں اور تاریخی وابستگی کی عکاسی کرتے ہیں۔
گیت کے ذریعے یہ واضح پیغام دیا گیا ہے کہ پاکستان اور افغانستان کے عوام ایک دوسرے کے دشمن نہیں بلکہ تاریخ، زبان، ثقافت اور روایات کے مضبوط رشتوں میں بندھے ہوئے ہیں۔
اس موقع پر عمران سواتی نے کہا کہ موسیقی ایک عالمی زبان ہے جو نفرت، فاصلے اور غلط فہمیوں کو ختم کرنے کی طاقت رکھتی ہے۔ انہوں نے کہا کہ اس گیت کا مقصد خصوصاً دونوں ممالک کے نوجوانوں تک امن، برداشت اور محبت کا پیغام پہنچانا ہے تاکہ خطے میں مثبت سوچ کو فروغ دیا جا سکے۔
انہوں نے مزید کہا کہ فنکاروں پر یہ ذمہ داری عائد ہوتی ہے کہ وہ اپنے فن کو امن اور بھائی چارے کے فروغ کے لیے استعمال کریں۔
ذرائع کے مطابق اس گیت کی موسیقی جدید اور روایتی پشتو دھنوں کا خوبصورت امتزاج ہے، جسے اعلیٰ معیار کی آڈیو ٹیکنالوجی کے ذریعے ریکارڈ کیا گیا ہے۔ اس گیت کی ویڈیو جلد فلمائے جانے کی بھی توقع ہے، جس میں پاکستان اور افغانستان کے عوام کی ثقافت، قدرتی مناظر اور روزمرہ زندگی کو اجاگر کیا جائے گا۔
قابلِ ذکر ہے کہ عمران سواتی اس سے قبل بھی سماجی، اصلاحی اور عوامی مسائل پر مبنی کئی گیت پیش کر چکے ہیں، جنہیں شائقین کی جانب سے بھرپور پذیرائی حاصل ہوئی۔ ان کا نیا امن ترانہ بھی موسیقی سے محبت کرنے والوں اور امن کے حامی حلقوں میں خاص اہمیت کا حامل قرار دیا جا رہا ہے۔
ذرائع کے مطابق یہ گیت جلد مختلف ڈیجیٹل پلیٹ فارمز اور سوشل میڈیا پر ریلیز کیا جائے گا، جہاں ناظرین اور سامعین پاک–افغان دوستی اور امن کے اس خوبصورت پیغام سے لطف اندوز ہو سکیں گے۔
