صحافیوں کی ویلفیئر کے تاریخی اقدامات پر وزیراعلیٰ خیبرپختونخوا سہیل آفریدی کو خراج تحسین
پشاور پریس کلب کی گورننگ باڈی کے اہم اجلاس میں صحافیوں کی فلاح و بہبود، ادارہ جاتی ترقی اور حکومتی اعلانات پر پیش رفت کا تفصیلی جائزہ لیا گیا، جبکہ سینئر صحافی انیلا شاہین سمیت مختلف مرحومین کے لیے فاتحہ خوانی اور ان کی خدمات کو خراجِ عقیدت پیش کیا گیا۔
اجلاس پشاور پریس کلب کے صدر ایم ریاض کی زیر صدارت منعقد ہوا، جس میں نائب صدر ضیا الحق، جنرل سیکرٹری عالمگیر خان، جائنٹ سیکرٹری گلزار خان اور گورننگ باڈی کے دیگر اراکین نے شرکت کی۔ اجلاس کے آغاز پر سینئر صحافی انیلا شاہین کے انتقال پر گہرے رنج و غم کا اظہار کیا گیا اور ان کی صحافتی خدمات کو سراہا گیا۔ اس کے علاوہ مختلف ممبران کے مرحوم عزیز و اقارب کے لیے بھی دعا مغفرت کی گئی۔
اجلاس میں “ہوپ رمضان سپورٹس گالا” کے کامیاب انعقاد کو سراہتے ہوئے پریس کلب کی منتخب قیادت اور سپورٹس کمیٹی کی کارکردگی کو قابلِ تحسین قرار دیا گیا۔ گورننگ باڈی نے اس بات پر زور دیا کہ اس قسم کی سرگرمیاں صحافی برادری میں اتحاد اور مثبت سرگرمیوں کے فروغ کا ذریعہ بنتی ہیں۔
صدر ایم ریاض نے اجلاس کو آگاہ کیا کہ 21 فروری 2026 کو حلف برداری تقریب کے موقع پر وزیر اعلیٰ خیبرپختونخوا محمد سہیل آفریدی کی جانب سے کیے گئے اعلانات پر عملی پیش رفت شروع ہو چکی ہے۔ ان کے مطابق، پریس کلب کے لیے 15 کروڑ روپے کی ون ٹائم اسپیشل گرانٹ کی منظوری دی جا چکی ہے، جبکہ جرنلسٹس ویلفیئر انڈومنٹ فنڈ کو 20 کروڑ سے بڑھا کر 50 کروڑ روپے کرنے کے احکامات بھی جاری کیے گئے ہیں۔
انہوں نے مزید بتایا کہ جدید سہولیات سے آراستہ نئی پریس کلب عمارت کی تعمیر کے لیے پی سی ون کی تیاری جاری ہے، جبکہ ممبران کے بچوں کے لیے 150 تعلیمی وظائف اور صحافیوں کے لیے سولر سسٹمز کی فراہمی کے حوالے سے بھی متعلقہ محکموں کو تحریری ہدایات جاری کر دی گئی ہیں۔
اجلاس میں محکمہ ہاؤسنگ خیبرپختونخوا کی جانب سے نیو پشاور ویلی میں میڈیا انکلیو کے منصوبے پر پیش رفت پر اطمینان کا اظہار کیا گیا۔ گورننگ باڈی نے فیصلہ کیا کہ جلد ہی پریس کلب کے خواہشمند اراکین کے لیے اس منصوبے کے دورے اور بریفنگ کا اہتمام کیا جائے گا تاکہ انہیں رہائشی سہولیات کے حوالے سے مکمل آگاہی فراہم کی جا سکے۔
گورننگ باڈی نے صحافیوں کی فلاح کے لیے ان اقدامات کو تاریخی قرار دیتے ہوئے وزیر اعلیٰ خیبرپختونخوا محمد سہیل آفریدی اور معاون خصوصی برائے اطلاعات شفیع جان کا شکریہ ادا کیا۔ اس کے ساتھ ساتھ رمضان کیش ریلیف پیکیج کی شفاف تقسیم اور انتظامات کو بھی سراہا گیا۔
اجلاس میں پریس کلب ممبران کے لیے نئے کارڈز کے اجرا اور ان کے ڈیزائن کی منظوری بھی دی گئی، جبکہ “ہوپ رمضان سپورٹس گالا” اور “فن فیئر” کی بہترین میڈیا کوریج کرنے والے صحافیوں کو مختلف کیٹیگریز میں نقد انعامات اور ایوارڈز دینے کا فیصلہ بھی کیا گیا۔
پشاور پریس کلب صوبے میں صحافیوں کی ایک اہم نمائندہ تنظیم ہے، جو نہ صرف پیشہ ورانہ سرگرمیوں بلکہ فلاحی اقدامات میں بھی کلیدی کردار ادا کرتی ہے۔ حالیہ اعلانات اور ان پر پیش رفت سے توقع ہے کہ صحافیوں کو مالی، تعلیمی اور رہائشی سہولیات میں نمایاں بہتری ملے گی، جس کے مثبت اثرات میڈیا کے معیار اور آزادی پر بھی مرتب ہو سکتے ہیں۔
اجلاس میں کیے گئے فیصلے اور حکومتی تعاون اس بات کی نشاندہی کرتے ہیں کہ آئندہ دنوں میں صحافیوں کی فلاح و بہبود کے منصوبوں میں مزید تیزی آئے گی، جس سے نہ صرف صحافی برادری بلکہ مجموعی طور پر معاشرے کو بھی فائدہ پہنچنے کی امید ہے۔
