گاڑی نمبر اور نمبر پلیٹ اب گاڑی کے چیسز کی بجائے گاڑی مالک کے قومی شناختی کارڈ سے منسلک کئے جائینگے
پشاور(نیوز رپورٹر) حکومت خیبر پختونخوا نے گاڑیوں کے مختلف جرائم میں استعمال کی روک تھام اور عوامی سہولت کو مد نظر رکھتے ہوئے رجسٹریشن کے موجودہ قانون میں تبدیلی کی ہے جس میں گاڑیوں کے نمبر اور نمبر پلیٹ کا نیا نظام متعارف کرایا گیا ہے جو کہ فوری طور پر پورے صوبے میں نافذ العمل ہوگا۔ گاڑی نمبر اور نمبر پلیٹ اب گاڑی کے چیسز کی بجائے گاڑی مالک کے قومی شناختی کارڈ سے منسلک کئے جائینگے،اس حوالے سے سرکاری طور پر گاڑی مالکان کو ہدایات جاری کی گئی ہیں کہ گاڑی مالکان3 ماہ کے اندر اپنی خریدی گئی گاڑیاں اپنے نام منتقل کر لیں جبکہ جن گاڑی مالکان نے اپنی گاڑیاں فروخت کی ہوئی ہیں وہ یہ امر یقینی بنائیں کہ انکی فروخت کی ہوئی گاڑیاں خریدار کے نام پر منتقل ہو جائیں۔ 30 نومبر 2025 کے بعد رجسٹریشن نمبر اور نمبر پلیٹس ایکسائز ریکارڈ میں موجود مالکان کے شناختی کارڈ سے منسلک کر دیئے جائینگے۔ نئے قانون کے مطابق گاڑی فروخت کرنے کی صورت میں شناختی کارڈ سے منسلک رجسٹریشن کاپی/سمارٹ کارڈ غیر فعال ہوکر پرانے مالک کے پاس رہیں گے، اور یہ نمبر کسی نئی گاڑی پر لگانے کی درخواست محکمہ ایکسائز کو موصول ہونے تک اپنے مالک کے پاس محفوظ رہیں گے، نئی گاڑی خریدنے کی صورت میں مالکان اپنی رجسٹریشن نمبر اور نمبر پلیٹس نئی گاڑی پر منتقل کر سکتے ہیں، غیر فعال نمبر کو سالانہ بایومیٹرک تصدیق کے بعد تین سال تک مالک اپنے پاس رکھ سکتا ہے۔ اگر تین سال کی مدت کے دوران نمبر پلیٹ مالک رجسٹریشن نمبر کا اندراج دوسری گاڑی پر نہیں کرتا تو ایسے نمبر منسوخ ہو جائینگے اور مالک کو رجسٹریشن کاپی، سمارٹ کارڈ اور نمبر پلیٹس اصل رجسٹرنگ اتھارٹی کے حوالے کرنا ہوں گی۔
