مسعود احمد کی پولیس لائنز میں ابابیل سکواڈ کے جوانوں سے ملاقات،مزید جانفشانی اور مستعدی کے ساتھ فرائض کی انجام دہی کی ہدایت
پشاور (کرائم رپورٹر: مدثر زیب) سٹریٹ کرائمز کی روک تھام اور شہریوں کے جان و مال کے تحفظ کے لیے قائم ابابیل سکواڈ کے جوان ہمہ وقت سرگرم عمل ہیں۔ تاہم ابابیل سکواڈ کی کارکردگی میں مزید بہتری کی گنجائش موجود ہے جسے بہتر حکمت عملی اور پیشہ ورانہ انداز میں فرائض کی انجام دہی کے ذریعے حاصل کیا جا سکتا ہے، ان خیالات کا اظہار ایس ایس پی آپریشنز پشاور مسعود احمد نے ملک سعد شہید پولیس لائنز میں ابابیل سکواڈ کے جوانوں سے ملاقات کے دوران کیا۔ اس موقع پر ڈی ایس پی عثمان خان اور ڈی ایس پی ہیڈکوارٹرز واجد شاہ خان بھی موجود تھے۔ایس ایس پی آپریشنز نے ابابیل سکواڈ کے جوانوں کو مزید جانفشانی اور مستعدی کے ساتھ فرائض کی انجام دہی کی ہدایت کرتے ہوئے کہا کہ سٹریٹ کرائمز کی روک تھام کیلئے قائم فرسٹ ریسپانڈرز ہونے کے ناطے ابابیل سکواڈ کی ذمہ داریاں مزید بڑھ جاتی ہیں، جنہیں خوش اسلوبی، جوانمردی اور عوامی خدمت کے جذبے سے ہی پورا کیا جا سکتا ہے۔انہوں نے کہا کہ ابابیل سکواڈ کے جوان شہریوں کے ساتھ خوش اخلاقی و ہمدردانہ رویہ اپنائیں، کیونکہ اسی رویے سے عوامی اعتماد حاصل کیا جا سکتا ہے۔انہوں نے خبردار کیا کہ شہریوں کے ساتھ ظلم و زیادتی ناقابلِ برداشت ہے، کسی بھی غیر اخلاقی سرگرمی یا اختیارات سے تجاوز پر زیرو ٹالرینس پالیسی اپنائی گئی ہے اور ایسے عناصر کے خلاف فوری محکمانہ کارروائی عمل میں لائی جائے گی۔ایس ایس پی آپریشنز مسعود احمد نے مزید کہا کہ شہریوں کی شکایات پر فوری عمل درآمد یقینی بنایا جائے، تاکہ پولیس فورس پر عوامی اعتماد برقرار رہے۔
